На ден 29 и 30.10.2026 година, во ООУ „Св. Јоаким Крчовски“ – Крива Паланка, ООУ Илинден - Крива Паланка и СОУ Ѓорче Петров - Крива Паланка беа реализирани едукативни работилници од страна на Извидничкиот одред „Наум Наумовски – Борче“ од Крива Паланка со учениците од претходно наведените училишта. Работилниците се предвидени во Активност 2, предвидена во рамките на проектот „Платформа за млади еко активисти“, кој е финансиски поддржан од Општина Крива Паланка. Целта на работилниците беше да се подигне свеста кај учениците за значењето на шумите, заштитата на природата и животната средина, како и за опасностите од шумските пожари и начините за нивно спречување. Преку теоретско предавање, едукативни игри и интерактивни активности, учениците имаа можност да се запознаат со важноста на шумите за животот на луѓето и животните, нивната улога во зачувувањето на природната рамнотежа и потребата од одговорно однесување кон природата. Посебно внимание беше посветено на опасностите од шумските пожари, причините за нивното настанување и мерките што треба да се преземаат за нивно спречување. Учениците беа поттикнати да размислуваат за сопствената улога во заштитата на животната средина и за начините на кои можат активно да придонесат за зачувување на природните богатства. Работилниците се одвиваа во позитивна и интерактивна атмосфера, со активно учество и интерес од страна на учениците. Преку содржините и активностите, тие ги проширија своите знаења за екологијата, заштитата на шумите и важноста на развивањето еколошки навики и одговорност кон природата. Заклучок Реализираните работилници придонесоа за подигнување на еколошката свест кај учениците и за развивање позитивен однос кон природата и животната средина. Учениците беа мотивирани да размислуваат и да постапуваат одговорно, да ги препознаваат опасностите од шумските пожари и да се вклучуваат во активности за заштита на природата. Со ваквите едукативни активности се поттикнува развојот на млади еко активисти кои ќе придонесуваат за почиста, поздрава и побезбедна животна средина. На работилниците зедоа учество 110 ученици и наставно образовен кадар
